Poesie | sabato 5 ottobre 2013
Claudio Landi
'O bastardo 'e fora
So venuto da luntano. Chiano chiano,
senza acqua ne mangià.
So venuto da luntano, cu ‘na speranza ‘e me salvà.
Cu ‘a speranza de salvà sti ccarne
e sti pile spuorche e fradice
ca nisciuno vo’ addurà,
ca manco ‘na femmena vo’ accarizzà.
So randagio, embè? Che ve ne fotte?
So cane zuzzo embè? A chi aggia da cunto?
Vuje site belle, prufumate, liscie…
je so tutt’ ‘o cuntrario, ma no pe’ chesto ve pozzo minaccià.
Nu juorno ero arrivato a nu quartiere comme ‘a n’ato,
nce steva ‘o mare e ciure profumate.
Cane e guardia, cu ‘o guinzaglio e ‘a signurina che ‘e ppurtava a spasso.
Cane belle de famiglia, ch’abbajano senza lamentarese, accussì pe sfizio.
Je che so randagio e guardavo, e guardavo e loro manco nu sguardo.
Che ll’aggio fatto?
Si na vota uno comme a mme l’azzannaje, e po venette acciso, mica fuje
colpa mia?
Je, v’ ‘o ggiuro, nun facesse nisciuna fetenzia, né a vuje né a ‘e cagnette
voste,
so de mala razza ma non pe’ chesto ve pozzo minaccià.
Venette ‘o veterinario, e chi ‘o capisce?
Vuleva a me ‘na carta,
jeva truvanno ‘o chip!
Je nun tenevo niente…ma nun pe’ chesto ‘o vulevo minaccià.
Me ricette che ero cattivo.
Che putevo esse periculuso pa’ ggente d’o paese e ll’ate cane.
Je nun putevo parlà, e pe fa’ capì ch’evo bbuono, r’alliccaje ‘e mmane.
Isso teneve ‘e guante… pecché teneva paura che c’ammiscavo quacche
malatìa.
Passaje nu cane ‘e guardia bello e tuosto.
Abbaiava comme ‘a n’ossesso.
Vuleva ‘mpressiunà cu ‘a sputazza che cadeva da chella vocca assatanata.
Je nun me muvette da addo stevo e ‘o guardavo.
Isso s’avvicinaje e m’azzannaje,
je nun putette reaggì e nisciuna manera e me truvaje ‘nterra a sanguinà
murente.
Era bastardo comme a mmè, ma era d’’o posto.
Era bastardo comme a mmè ma steva apposto,
o sapevano tutte quante e po’ era bello e tuosto.
Retteno a colpa a mme, ca’ song aunesto.
Me mannajeno a ‘nu canile de campagna,
dint’ ‘a ‘na gabbia sporca e scura,
comme a sti pile ‘e sangue e fango che me ritrovo,
‘ngoppa a sti ccarne meje.
Je vulevo sulo magnà, beve e alliccà ‘e mmane…
e invece so ‘nu bastardo ‘e fora
e mmiezo ‘a via nun pozzo sta…
nun pozzo pazzià cu sti ccriature…
nun pozzo correre areto ‘a ‘nu pallone.
Mo stongo areto ‘a ‘na gabbia de fierro arruzzenito,
ma nun è pe’ chesto
ca nun ve putesse minaccià.